O BNG critica a suba do 30 % do prezo da vivenda pública e Rueda deféndea para incentivar a promoción
O BNG critica a suba do 30 % do prezo da vivenda pública e Rueda deféndea para incentivar a promoción
O BNG critica a suba do 30 % do prezo da vivenda pública e Rueda deféndea para incentivar a promoción
Rueda e Pontón enfróntanse pola vivenda e acúsanse mutuamente de "propaganda"
Rueda asume incrementar os fondos para o SAF e Besteiro tamén o reclamará ao Goberno
![O presidente da Xunta Alfonso Rueda responde preguntas dos grupos, este mércores en Santiago de Compostela (EFE / Lavandeira Jr.)](https://img-g24-crtvg.flumotion.com/prog24/2024/20240710/RUEDASESIONCONTROLEFE.jpg)
O presidente da Xunta Alfonso Rueda e a líder da oposición Ana Pontón enfrontáronse polo problema da vivenda, sobre o que se acusaron mutuamente de facer "propaganda", con "slogans" partidistas ou con cifras que son "fume", respectivamente.
Na sesión do control ao Goberno do pleno do Parlamento, o último ordinario antes das vacacións de verán, a portavoz nacional do BNG esixiu a Rueda que aclare que vai facer "máis aló da propaganda e os titulares" para garantir o dereito dos galegos a unha vivenda digna.
Ao seu xuízo, o PPdeG non só leva 15 anos "dinamitando a política de vivenda", senón que "mente e engana os galegos" con cifras que son "fume" mentres "boicotea" as políticas dos concellos, como o de Santiago de Compostela, para regular a vivenda de uso turístico (VUT).
Rueda asegurou que o BNG "falsea as cifras" e advertiulle que "con slogans non se constrúe vivenda", nin tampouco indo contra os propietarios por "ideoloxización". "Hai concellos responsables que colaboran e nós seguiremos colaborando con eles", afirmou en referencia ao de Pontevedra, do BNG, mentres que Pontón só fai "propaganda", recriminoulle.
Sobre o caso en concreto de Santiago de Compostela, augurou que "van ter cheas de pisos turísticos" pola regulación que preparan para estas vivendas, que prevé que poidan estar neste réxime durante uns meses ao ano.
Neste sentido, Pontón reclamou a Rueda que deixe de "amparar ilegalidades" e se preocupe de retirar as VUT ilegais no rexistro de pisos turísticos da Xunta, que cifrou nunhas 700. Unha recomendación coa que Rueda ironizou: "Si que sería necesaria para deixar sitio aos 8.000 que vai dar de alta o Concello de Santiago".
Tamén afirmou que ningún municipio de Galicia pediu a declaración de zona tensionada no seu territorio, tras reclamarlle Pontón que actúe nesta materia e cumpra a normativa estatal para limitar os prezos dos alugueiros, algo que para Rueda só ten como consecuencia "retirar vivendas do mercado" mentres que a Xunta aposta por construír.
Pontón ironizou con que Rueda ademais de presidente sexa agora "pitoniso" e lembrou que o plan de vivenda da Xunta 2015-2020 estipulaba a construción de 870 novas vivendas de promoción pública e "só construíron 40". Agora o compromiso do Goberno galego é construír 20.000 novas ata o final da lexislatura co que "din que van facer o que non fixeron en 15 anos", segundo a líder do BNG, que criticou que a Xunta aprobou o mes pasado un incremento do prezo da vivenda protexida dun 30 %.
Algo que Rueda defendeu como "unha medida absolutamente lóxica" para que haxa promotores dispostos a construílas e poñelas no mercado. Con todo, o presidente destacou que o aumento é "menor que noutras comunidades autónomas".
O presidente galego asegurou que a Xunta adxudicou desde 2009 un total de 2.403 vivendas públicas de nova construción, unha cifra que case se eleva a 5.000 coas que son adxudicadas por segunda vez a outros propietarios, e acusou o BNG de ser o que fai "maquillaxe e Photoshop" para ocultar a súa liña ideolóxica.
Rueda ironizou este mércores coas "prioridades" de "independencia, monolingüismo e imposición ideolóxica" reafirmadas no XVI Congreso da Unión do Povo Galego (UPG), despois de que a portavoz nacional do BNG Ana Pontón lle reclamase "cumprir a Constitución" co dereito a unha vivenda.
O conclave celebrado o pasado domingo en Santiago pola UPG, que é a facción maioritaria do Bloque, converteuse nun dos temas estrela que empregan os populares durante o pleno desta semana no Parlamento galego.
Así, quixo diferenciar as "prioridades" da UPG, centradas en "comunismo e independencia", das do Goberno galego, entre as cales situou á vivenda. "Tome en serio os problemas dos galegos e veña ao Parlamento para responder o que se lle pregunta", espetoulle Pontón, quen instou a "poñer lugar, día e hora" para contrastar os datos sobre vivenda, como as 400 que Rueda asegurou que están en execución dentro destes primeiros cen días de Goberno.
Rueda asume incrementar os fondos para o SAF e Besteiro tamén o reclamará ao Goberno
O xefe do Goberno galego asumiu que hai que incrementar os fondos que o Executivo autonómico destina ao Servizo de Axuda ao Fogar (SAF) que prestan os concellos, e o líder do PSdeG José Manuel Gómez Besteiro asegurou que é algo que tamén reclamará ao Goberno central.
Na súa quenda na sesión de control, Besteiro cuestionou a relación da Xunta cos concellos e reprochou tanto a achega que fai ao SAF coma o incremento do canon que cobra a firma xestora de residuos Sogama aos municipios e acusou a Rueda de preferir ser, en materia recadadora, o shériff de Nottingham en lugar dun Robin Hood, por rebaixar impostos aos ricos.
Rueda replicou que o "afán recadatorio" é o do Goberno central, ao que responsabilizou da subida do canon de Sogama, unha empresa controlada pola Xunta, polo imposto estatal que deriva dunha directiva europea que España foi "o único país" en transpoñer "xa".
Sobre o SAF, sinalou que a Xunta destina este ano 130 millóns de euros, pero "é necesario volver aumentalo", polo que está en conversacións coa Federación Galega de Municipios e Provincias (Fegamp). Destacou que se trata dunha competencia "directamente municipal" por unha lei do anterior goberno bipartito autonómico.
Rueda calculou que o Goberno central debe á Xunta 2.500 millóns de euros de "incumprimentos" da lei de persoas en situación de dependencia, que ambas as dúas administracións deben financiar a partes iguais, pero a autonómica achega "case o 70 %", dixo.
As relacións municipais
O presidente galego salientou a boa relación da Xunta cos concellos e puxo de exemplo as recentes reunións cos alcaldes de Vigo, Lugo, e A Coruña, todos eles socialistas.
"Oxalá a relación do Goberno coa Xunta fose a mesma que ten a Xunta cos concellos de todas as cores políticas", comentou.
"Imos tratar a todos os concellos con respecto, lealdade e cooperación, porque maltratar, especialmente os seus, nada mellor que vostede", concluíu Rueda, quen botou en cara a Besteiro cuestións internas do partido, como os expedientes abertos no Carballiño e Santiago de Compostela.