Última xornada da operación retorno nos aeroportos con 114 operacións

O aeroporto de Santiago, con 64 operacións programadas para  este domingo foi o que máis actividade tivo durante esta mañá. Aos viaxeiros previstos sumáronse os de tres voos de Vigo procedentes de Madrid e Barcelona que por mor da mala visibilidade finalmente tiveron que aterrar no Rosalía de Castro.

A consecuencia diso os pasaxeiros que tiñan que saír neses voos foron trasladados en autobús a Santiago ao mediodía e chegaban temendo perder os enlaces que tiñan ata o seu destino final.

Tiñamos pensado saír de Vigo ás nove e dez e canceláronnos o voo polo vento e pola chuvia e trouxéronnos para Santiago. 

Nós iamos de Vigo a Menorca. Anularon o voo e a ver se chegamos porque temos o enlace en Barcelona e non sei se chegaremos a tempo.

Aqueles que aproveitaron ata o último día para volver das vacacións facturaban a equipaxe pensando na rutina de mañá.

Toca volver e con moita tristeza e morriña, máis nestas datas. Hoxe é o día máis triste. 

Sempre custa un pouquiño porque de vacacións estase ben e deixar a familia tamén.

Agora vivimos en Colombia e vimos no Nadal visitar a familia. Agora tócanos un voo de nove horas ou así de volta á casa.

Peinador e Alvedro tiñan previsto un total de 50 operacións este domingo, o día de máis actividade desta operación retorno.