Desirée estaba viva no momento en que sufriu as lesións

Logo de testificaren os médicos de urxencias e os psiquiatras que atenderon no HULA a Ana Sandamil, a repetición do xuízo polo crime de Muimenta chegou á súa última xornada de declaracións.

Nela interveñen os psicólogos e psiquiatras forenses que examinaron a presunta parricida, testemuñas fundamentais para as acusacións á hora de determinar a súa imputabilidade.

Manuel Ferreiro, avogado da acusación particular: "Os que foron declarando son psiquiatras clínicos, que parten de que o que di ela é certo. Son os únicos que cuestionan o que ela pode dicir e analizan todo. É unha proba fundamental".

Beatriz Pardo, avogada da acusación popular: "A posición da Fundación Amigos de Galicia e da acusación popular é desacreditar a relacion das ideas delirantes que padecese co crime. A nena tiña sete anos e a derradeira cara que viu foi a da súa nai matándoa".

José Manuel Leal, pai da pequena Desirée: "Este monstro sabía perfectamente o que facía".

Tamén declararon os forenses do Instituto de Medicina Legal de Galicia que analizaron a causa da morte da vítima do asasinato, a pequena Desirée Leal.

José Luís Cascalla, médico forense: "A vítima estaba viva no momento da produción das lesións e as súas fibras foron esmagadas. Os labios foron comprimidos entre os dentes e a man, o antebrazo ou o que apertase".

Prevese que a vista oral polo crime de Muimenta, en que se pide prisión permanente revisable para a nai da vítima, remate o luns vindeiro coas conclusións finais das partes.