Últimas visitas guiadas á Cidade da Xustiza de Vigo
Últimas visitas guiadas á Cidade da Xustiza de Vigo
O luns comeza o traslado dos 38 xulgados da cidade cara á nova sede
As visitas guiadas non precisan reserva e permiten o acceso á terraza con vistas de 360º sobre Vigo
Na memoria colectiva sempre será o Pirulí. Pero hoxe aquel hospital de 18 plantas onde naceron a maioría dos vigueses prepárase para albergar os 38 xulgados da cidade. O luns comeza o traslado e pecha para o público, así que moitos aproveitan a última oportunidade para visitalo e recordar.
En grupos de 15 e sen reserva previa, os cidadáns que se acheguen esta semana coñecerán os detalles da reforma do arquitecto Alfonso Penela. Visitarán a sala de macroxuízos, as oficinas dos novos xulgados e subirán pola histórica escaleira de mármore ata a terraza con mellores vistas da cidade.
Nos vindeiros sete meses o edificio e as rúas da contorna irán recuperando a vida co traslado dos xulgados e de 500 funcionarios. Será a fin de seis anos de reformas en que os quirófanos pasaron a ser tribunais na maior obra xudicial da historia da comunidade.
