Un fondo de pensións holandés faise co control das autoestradas galegas
Un fondo de pensións holandés faise co control das autoestradas galegas
Globalvia vendeulle ao fondo APG toda a súa participación en Itínere, propietaria da AP-9, AG-57, AG-55 e da AP-53
De momento descoñécese o importe económico da operación
Globalvia chegou a un acordo co fondo APG, o maior provedor de pensións dos Países Baixos, para vender toda a súa participación en Itínere e resolver todos os litixios que a compañía española arrastraba desde hai anos pola súa participación nesta empresa.
Desta forma, o fondo neerlandés controlará de forma exclusiva as autoestradas galegas AP-9 (que vertebra o eixo atlántico), AG-57 (Vigo-Baiona), AG-55 (A Coruña-Carballo) e AP-53 (Santiago-Dozón) e mais a AP-66, de Asturias a León; a AP-8, no País Vasco, ou a AP-15, en Navarra.
"Este conxunto de acordos reflicte o compromiso das dúas compañías por resolver as disputas sobre Itínere, pechando os desacordos que se alongaron no tempo", anunciou Globalvia nun comunicado. De momento, non transcendeu o importe económico da transacción.
A empresa española de mobilidade adquiriu por primeira vez unha participación en Itínere o 17 de outubro de 2018 e aumentou a súa participación ata o 40 % en 2019. Ata o de agora, APG tiña o 56 % de Itínere a través de varias entidades e suma agora o 40 % de Globalvia. Mediobanca foron asesores de Globalvia na transacción e Jefferies de APG.
Nos últimos anos, Globalvia instou en varios procedementos xudiciais a súa lexitimidade para facerse co 90 % do capital de Itínere, argumentando que varias operacións levadas a cabo no capital da empresa no pasado non se fixeron conforme a dereito.
