Un home do Barco de Valdeorras vai recibir máis de 80.000 euros de herdanza dun coñecido falecido hai dous anos

Vaia sorpresa levou Silvestre cando soubo que vai recibir os beneficios de catro produtos financeiros dun compañeiro seu falecido hai dous anos.

Silvestre é testemuña de Xehová e visitaba a miúdo o finado, que vivía só en Viana. O que non esperaba é que o puxese como único beneficiario dunhas pólizas de aforros e fondos de investimento.

Que el poida contar agora con máis de 80.000 euros é froito do traballo dunha axente de seguros de Verín que dende que faleceu o seu cliente, en decembro de 2019, non parou de buscar.

Tirando de moitos fíos conseguiron atopar no Barco de Valdeorras o afortunado. Din ambos que, despois desta satisfacción, continuarán facendo os seus traballos o mellor que saben.