Un incendio calcina dous furgóns no peirao do Berbés en Vigo

Un incendio calcinou a primeira hora deste domingo dous furgóns no porto pesqueiro do Berbés en Vigo. Os bombeiros informaron, unha vez rematada a súa intervención para extinguir as lapas, de que a proximidade dos vehículos a unha nave fixo que arderan catro armarios no vestiario dos traballadores do peirao.

O persoal do porto foi o que contactou co 112 para avisar do lume no lugar e ata a zona desprazáronse, ademais dos bombeiros, axentes da Policía Nacional e Local e tamén foi alertada a Autoridade Portuaria e a Garda Civil.

A Policía trata de determinar a orixe do incendio no porto vigués.