Un incendio calcina maquinaria dunha granxa de Guntín

Os estoupidos espertaron de madrugada os veciños de Ferroi, en Guntín. Ardían as instalacións dunha granxa da que conseguiron sacar a tempo as vacas que había no interior das cortes. Peor sorte correron os coellos, pero non houbo danos persoais.

"O incendio afectou varios tractores e diversa maquinaria. Había tamén forraxe, que é o que levou máis tempo extinguir", explica Carlos Ulla do GES de Friol.

Arderon por completo dous tractores e un autocargador, e quedou seriamente danada a estrutura do alpendre. Descoñécese como se orixinou o incendio, pero unha das hipóteses é a dun posible curtocircuíto nun dos vehículos.

"A estrutura do alpendre está tamén bastante afectada, a temperatura aquí foi moi alta. A maquinaria ten gasóleo e aceite, que supoñen un incendio cunha temperatura bastante elevada", sinala Carlos Ulla do GES de Friol.

O traballo dos bombeiros de Sarria e dos efectivos do GES de Friol conseguiu evitar que o lume se propagase ás tres vivendas lindeiras que compoñen o pequeno lugar de Vilaboa.