Detido un mozo de 20 anos nas Neves tras matar a nai cun coitelo
Detido un mozo de 20 anos nas Neves tras matar a nai cun coitelo
O suceso tivo lugar pasadas as 21:00 horas deste mércores no domicilio familiar situado na parroquia de Rubiós
O mozo é o presunto autor do acoitelamento de súa nai e despois fíxose algún corte
A Garda Civil detivo un mozo de 20 anos por ser o presunto autor da morte de súa nai, de 60, no concello pontevedrés das Neves.
Segundo informaron fontes da Benemérita, o suceso tivo lugar pasadas as 21:00 horas deste mércores no domicilio familiar situado na parroquia de Rubiós. O mozo acoitelou presuntamente a súa nai e despois fíxose algún corte. No domicilio estaba tamén unha avoa do detido.
O mozo foi trasladado ata o hospital Álvaro Cunqueiro de Vigo, onde foi atendido das feridas e agora permanece detido nos calabozos de Ponteareas.
O Concello das Neves decretou tres días de loito oficial, que comezan este xoves e ata o sábado, pola morte de Irene Rodríguez, de 60 anos de idade, presuntamente a mans do seu fillo pequeno.
Este xoves, ás 12:00 horas, decenas de persoas concentráronse ante o Concello das Neves para gardar un minuto de silencio pola vítima. Alí, o alcalde, José Manuel Alfonso González (PP), lamentou os feitos, asegurando que Irene era unha muller moi coñecida na vila, debido a que fora durante moitos anos a carteira da localidade.
El pediu "precaución" á hora de "sinalar a unha persoa", apuntando aos problemas de saúde mental que padece o detido, o cal estaba a tomar medicación. "Desde as autoridades temos que poñer o foco de atención das enfermidades mentais, sobre todo nos mozos", reivindicou, insistindo na importancia de ofrecer as ferramentas necesarias á poboación para poder superalas.
A pesar de todo, subliñou que non existían denuncias previas por malos tratos, aínda que algún veciño comentaba algunha "discusión esporádica entre nai e fillo", pero "sen máis". "Hoxe é un día terriblemente duro" e "triste", lamentou o rexedor, indicando que onte á noite xa foi informado da noticia e acudiu ao lugar dos feitos despois das 22:00 horas.
Dor entre os veciños
Veciños das Neves mostraron a súa dor ante a terrible noticia coa que amenceron este xoves. Durante o minuto de silencio, decenas de persoas puxeron o foco na amabilidade de Irene, que pedira unha excedencia no traballo para coidar á súa nai, duns 83 anos. Segundo os veciños, a muller estaba solteira e tiña dous fillos, de 25 e 20 anos. Este último, con problemas de saúde mental, presuntamente acabaría coa súa vida este mércores. O mozo foi detido e previsiblemente pasará este venres á disposición do xulgado de garda de Ponteareas.
