Un novo marco enerxético para Galicia, por Venancio Salcines

A Xunta está a redeseñar o papel da enerxía renovable en Galicia. E faino cunha idea central, minimizar os seus impactos negativos e maximizar os positivos. Este novo marco puxo tan nerviosa a industria eólica que ata tivo que actuar a patronal europea. Agora, despois de aclaracións e busca de consensos xa temos o mapa final, que non perde a filosofía do punto de partida.

O eixe central é que os novos parques, para ter licencia, teñen que asegurar que o 50 % da súa electricidade irá a proxectos industriais vencellados a Galicia. E se o promotor encontra dificultades para chegar a acordos sempre terá a posibilidade de facelo con Recursos de Galicia, a entidade público-privada que impulsou a Xunta.

O segundo eixe é a repotenciación, os promotores contarán con máis tempo, e non está pechado un incremento de potencia se cumpren coa obriga de dividir por catro os aeroxeradores instalados.

O terceiro eixo é de carácter xurídico, concederá aos parques o rango de “interese público superior” de cara a que o Tribunal Superior de Xustiza de Galicia non use o risco medioambiental para paralizalo con medidas cautelares.

Galicia ten enerxía, o propio é que os galegos poidan beneficiarse dela. O novo marco dará un paso importante nesta dirección.