Un novo roubo de cobre afecta dúas liñas de proximidade en Cataluña

Un novo roubo de cobre deixou sen servizo de trens durante varias horas dúas liñas de proximidade na provincia de Lleida. Nos accesos a Barcelona por ferrocarril, esta mañá a liña 1 recuperou o servizo habitual e noutras catro liñas parte do traxecto séguese facendo en autocar.

O novo roubo de cable de cobre na rede ferroviaria catalá ocorreu a primeiras horas deste martes no treito que une as localidades de Les Borges Blanques e Vinaixa, en Lleida. A interrupción da circulación por este treito afectou aos dous primeiros trens da xornada nas liñas 13 e 14.

Pasadas as oito da mañá, os técnicos do Adif conseguiron repoñer o cable subtraído e o tráfico ferroviario quedaba restablecido.

Nos accesos a Barcelona por tren, a liña 1 de proximidade funciona con normalidade, pero persisten os problemas noutras catro liñas onde parte do traxecto se fai en autobús.

“Polo momento non vou mal de todo, pero chego tarde. Hai persoas que levan unha hora esperando o autobús e están totalmente desesperados”; “Chego tarde ao traballo, pero sobre todo volvo tarde desde Barcelona cando teño que volver a Granollers. Hai moitos atrasos e é moi difícil chegar á casa á hora”, dicían algúns viaxeiros.

Este tipo de roubos repítese a pesar de que as horas de vixilancia policial sobre as infraestruturas ferroviarias catalás aumentaron, e tamén o fixo o número de detidos. “Entón, se os Mossos aumentaron un 250 por cento os esforzos en previr o delito de roubo de cobre, gustaríame saber en que porcentaxe aumentaron os investimentos en Cataluña para mellorar a seguridade das infraestruturas”.

A Síndica de Greuges de Cataluña abriu de oficio unha investigación polos incidentes do servizo de trens de proximidade e responsabilizou a Renfe por non garantir o dereito de mobilidade de miles de persoas.