Un paciente ingresado en Neuroloxía do CHUAC agride varias traballadoras

Un paciente que estaba ingresado na planta de Neuroloxía do Complexo Hospitalario Universitario da Coruña agrediu o martes varias traballadoras da unidade. Segundo informan fontes da Xerencia da área da Coruña-Cee, aplicáronse os protocolos da Xunta, polo que se trasladará o ocorrido á Fiscalía de oficio.

Trátase dun paciente cunha afectación neurolóxica que se alterou e propinou varias rabuñaduras e golpes ao persoal da planta, ata o punto de que tivo que acudir persoal de seguridade.

Con todo, as mesmas fontes insisten en diferenciar este suceso do ocorrido hai un mes nas urxencias do CHUAC, cando un paciente apuñalou de gravidade un enfermeiro e feriu outro cun obxecto punzante, uns feitos que desataron numerosas protestas para reclamar melloras nas medidas de seguridade.

Fronte ao exposto pola Xerencia, desde a Comisión de Centro, a súa presidenta, María Formoso, asegurou que "non había protocolo que iniciar porque non están a día de hoxe". Ademais, sinalou que as traballadoras chamaron ao servizo de seguridade do centro, pero que se presentou "un só profesional xa que era día festivo".

Do paciente, indicaron que non era "potencialmente agresivo", pero que despois xa na unidade "desorientouse", polo que tiveron que utilizar "medidas de contención con el, das que se liberou". "Cando se deron de conta de que andaba polo corredor, deron a voz de alarma", sinalou sobre as traballadoras e confirmando a agresión.