Un remeiro de Cabo, sancionado as catro próximas regatas da ACT logo dun positivo

O Xuíz de Disciplina da Liga ACT declarou firme a resolución pola que sanciona o remeiro de Cabo da Cruz Roberto Torres López para as primeiras catro regatas da vindeira temporada.   

Segundo ditaminou, o remeiro cometeu unha "infracción grave" prevista no artigo 14.0 do Regulamento Disciplinario da competición. A sanción é consecuencia dun resultado adverso nun control antidopaxe realizado na Ikurriña de Zarautz no pasado mes de agosto. 

Torres López deu positivo por benzoilecgonina (metabolito da cocaína). O remeiro terá que someterse a un control antidopaxe, que correrá pola súa conta, de forma previa á incorporación á primeira regata que poida realizar unha vez cumprida a sanción.