Un veciño de Ferrol recibe unha malleira na casa tras recriminar a uns mozos o ruído que facían na rúa

Este domingo contra as cinco da madrugada un veciño da rúa Magdalena de Ferrol. que conta con distintos locais de lecer nocturno, ao non poder durmir, saíu á fiestra para reclamar a un grupo de mozos que deixasen de facer ruído na rúa.

Os rapaces fixeron caso omiso e ademais forzaron o portal para entrar no inmoble, conforme fontes policiais, e subiron ata a vivenda. O home abriu a porta coa intención de facerlles fronte pero recibiu unha malleira.

Os altercados entre residentes e pandas que queren prolongar a noite de troula nesta rúa suceden con certa frecuencia nos últimos tempos.

Unha ambulancia trasladou o home ata o Hospital Arquitecto Marcide, onde permanece en observación polas feridas que presenta.

A Policía Nacional acudiu con rapidez á zona, pero os protagonistas da liorta xa se deran á fuga, aínda que contan cos pistas fiables para poder dar con eles.

A Policía Local tamén participa no operativo para dar cos agresores. As forzas policiais revisan as cámaras de seguridade da zona.