Un xulgado avala as medidas de Vigo para reducir o impacto acústico do Nadal
A xuíza conclúe que, "salvo en momentos puntuais", respectáronse os niveis máximos legalmente permitidos
Centenares de persoas asisten ao encendido das luces de Nadal (Foto de arquivo/Javier Vázquez/Europa Press)
O Xulgado do Contencioso-Administrativo número 1 de Vigo avalou as medidas adoptadas polo Concello da cidade para reducir o impacto acústico do Nadal, segundo a sentenza que facilitou o Tribunal Superior de Xustiza de Galicia (TSXG).
A xuíza considera que se respectaron os niveis máximos de ruído “salvo en determinados momentos puntuais”, e que as superacións “deben considerarse como admisibles, atendendo a criterios de proporcionalidade derivados da ponderación do dereito ao descanso dos veciños e o interese público derivado da celebración dos festexos do Nadal”.
A resolución declara executada a sentenza do Tribunal Superior de Xustiza de Galicia (TSXG) que en 2024 condenou ao Concello por vulnerar dereitos fundamentais dunha veciña no Nadal 2022-2023.
Fronte ao alegado pola afectada, a xuíza recalca que o fallo do TSXG “en ningún momento ordena a recolocación dos festexos do Nadal, senón que condena ao Concello de Vigo a adoptar en diante as medidas necesarias para evitar a reiteración da súa conduta lesiva e para garantir que os niveis de ruídos exteriores e interiores non pasen os limiares fixados polas normas aplicables”.
"Se acreditou que as medidas se adoptaron xa na campaña de celebración do Nadal deste ano, tal e como alega o Concello de Vigo, que se basea en informes técnicos dunha empresa especializada e do propio consistorio", afirma a xuíza.
Os informes certifican que, en xornadas de baixa afluencia, o ruído estivo por baixo dos valores límite; e en días de alta afluencia, “cumprían, en xeral”, salvo “na contorna máis próxima á árbore de Nadal de Porta do Sol”, onde houbo superacións “en momentos puntuais e debidos á alta concentración de xente”.
Tamén se rexistraron “lixeiras superacións puntuais” por “os berros da xente” en atraccións como a nora. A empresa especializada constatou que "o incremento dos niveis de ruído debido aos berros da xente, entre as xornadas de alta e baixa afluencia, é notablemente menor que nas anteriores edicións" e destaca que "esa mellora nos niveis de ruído débese ás medidas de redución tomadas na presente edición".
