Unha avaría eléctrica ensombrece a primeira viaxe en AVE dende Galicia

Tres anos despois do que estaba previsto, Galicia estrea os trens Avril. As cidades galegas van quedando así conectadas pola alta velocidade. Na estación de Vigo vivíase o ambiente das grandes ocasións.

O flamante Avril agardaba os viaxeiros da primeira viaxe directa a Madrid en alta velocidade. Todo eran bos augurios. "Vense avances tecnolóxicos por todos lados, inmellorable", comentaba un dos primeiros usuarios. E outro esperaba "que sexa un éxito".

Pero se algo non se pode dicir do debut é que fose un éxito. En Compostela o tren paraba 6 minutos máis do previsto. Demasiados peregrinos. Pero o peor chegaría ás portas de Ourense.

"A cincocentos metros, cando xa viamos a plataforma, apagáronse as luces e díxonos a azafata que era un problema de tensión. Faltaron as luces, a cisterna do baño, que é automática nestes novos trens", contaba un dos viaxeiros.

Durante hora e media, os case 500 pasaxeiros permaneceron pechados nos vagóns. "Non se pode ir ao baño, non se pode ir á cafetería, a temperatura non sei que", queixábase unha usuaria.
"Para ser a inauguración é un desastre", lamentaba outra.

Renfe fala dun fallo na peza que conecta o tren coa catenaria, pero o certo é que pouco antes, outro tren quedara hora e media parado no mesmo punto, explicado entón por un suposto fallo na sinalización.

Finalmente, o vello Alvia chegou ao rescate do novo Avril. Remolcouno ata a estación de Ourense, desde onde puido seguir xa sen máis problemas. A viaxe inaugural chegou á capital de España ás catro menos cuarto, dúas horas e 13 minutos tarde.

Renfe tivo que recolocar noutros trens aos moitos viaxeiros que perderon os seus enlaces para outros puntos de España: para outros, a estrea da alta velocidade derivou na perda de citas médicas, entrevistas de traballo ou chegadas tarde ao traballo.