Unha liorta con bates en Caldas de Reis remata con dous hospitalizados

Estes días en Caldas de Reis só se fala do acontecido o domingo pasado, contra as oito da tarde, neste pendello situado nun descampado próximo á rúa río Umia. Unha pelexa multitudinaria, en que se empregaron bates e mesmo barras de ferro, ten conmocionada e atemorizada a vila.

Manuel Castro Escariz, Inspector xefe da Policía Local de Caldas de Reis, asegura que cando chegaron había dúas persoas feridas, un deles inconsciente. Segundo apuntou, empregaron bates de béisbol; de feito, incautáronse dun deles.

Segundo fontes policiais, amigos dos agredidos quixeron tomar a xustiza pola man e comezaron a perseguir os presuntos agresores polas rúas de Caldas; de feito colleron a un deles e déronlle unha malleira. Dúas ambulancias do 061 desprazáronse ata a zona para atender os feridos.

Manuel Castro Escariz, Inspector xefe da Policía Local de Caldas de Reis, di que houbo tres feridos un dos agresores e dous agredidos. Sinala que un estaba inconsciente cando chegaron as asistencias.

Nunha operación conxunta, levada a cabo pola Policía Local e pola Garda Civil, conseguiron localizar os presuntos agresores. Dous deles eran menores tutelados pola Xunta. A Garda Civil abriu dilixencias contra o terceiro, o único maior de idade implicado na liorta. A investigación para esclarecer as causas da mesma segue aberta. De momento recibiron dúas denuncias por un delito de lesións.