Unha muller morta e un ferido grave tras estrelarse unha avioneta dunha escola de pilotos en Palencia

Unha alumna dunha escola de pilotos faleceu e o seu instrutor quedou ferido grave ao estrelarse contra o chan unha avioneta na que viaxaban en Abia de las Torres (Palencia), segundo informou a EFE o servizo de Emerxencias 112 de Castela e León e a Garda Civil.

A avioneta realizaba un voo de instrución e pertence á empresa FLyBy, unha escola privada de formación de pilotos con sede no aeroporto de Burgos de onde despegara esta mañá. No seu interior viaxaban o instrutor, un home de nacionalidade estranxeira que resultou ferido grave, e a alumna, unha muller nova segundo informaron a EFE fontes do aeroporto de Burgos e da Garda Civil.

O aeroporto e o Servizo de Busca e Rescate Aéreo (SAR) do Exército do Aire foron os que avisaron da desaparición desta avioneta entre a localidade palentina de Osorno e o límite coa provincia de Burgos, en torno ao quilómetro 106 da autovía A-231.

O Centro Coordinador de Emerxencias da Xunta de Castela e León dirixiu a procura da aeronave e deu aviso á Garda Civil (COS) de Palencia e Burgos, aos Bombeiros da Deputación de Palencia e ao centro coordinador de urxencias (CCU) de Emerxencias Sanitarias que enviou unha ambulancia de soporte vital básico. Ademais, o centro coordinador de emerxencias enviou á zona o helicóptero de rescate da Xunta; e o SAR, un dos seus helicópteros.

Tras uns minutos de busca, o helicóptero de rescate da Junta localizou a avioneta sinistrada nunha terra de labor xunto ao río Valdavia, a uns 600 metros ao norte da localidade de Abia de las Torres, cun dos seus ocupantes falecido e outro, ferido grave. Emerxencias Sanitarias activou un helicóptero sanitario e persoal sanitario de Atención Primaria do centro de saúde de Osorno que se desprazaron ao lugar.