Unha nai denuncia a agresión de tres compañeiros de clase á súa filla nun colexio de Lugo
O incidente ocasionoulle múltiples traumatismos e unha lesión nas cervicais das que foi atendida no hospital
Na denuncia, a menor asegura que dous profesores non fixeron nada para impedilo a pesar de que supostamente os avisou de que a estaban agredindo
Unha nai denunciou a agresión que sufriu a súa filla por parte de tres compañeiros de clase nun colexio de Lugo.
Segundo o relato da proxenitora á Policía Nacional, ao que tivo acceso EFE, a menor foi agredida o xoves pasado no medio dunha clase, o que lle ocasionou múltiples traumatismos e unha lesión nas cervicais das que foi atendida no hospital Ribeira Polusa de Lugo.
Na denuncia interposta pola nai en sede policial, esta manifestou que o xoves foi recoller á súa filla ao centro educativo e ao preguntarlle que tal en clase contoulle que mal porque tivera un problema en xadrez.
A menor contoulle que tres compañeiros lle pegaran e que dous profesores non fixeron nada para impedilo, a pesar de que a nena supostamente os avisou de que a estaban agredindo.
De acordo coa súa versión, a agredida saíra en defensa de dúas amigas súas ás que estaban a insultar os tres presuntos agresores, que a tomaron con ela, déronlle patadas, unha puñada no ollo e outros no peito mentres un deles a tiña agarrada.
Tamén lle propinaron patadas e retorcéronlle a man dereita, que tiña vendada, tirárona ao chan, agarráronlle do pelo e acaneáronlle a cabeza.
A nena di que finalmente logrou esconderse no baño ata que unha das amigas acudiu a buscala.
A nai lamentou que, ademais, a menor deixou de esta convidada a uns aniversarios aos que estaba convocada toda a clase para "evitar conflitos".
