Unha seca histórica en España que pon en cuestión a xestión da auga

O período entre o 1 de maio e o 15 de agosto deste ano resultou ser o máis seco desde que existen datos oficiais en España, concretamente desde 1950. Moita menos choiva da habitual, temperaturas excepcionalmente elevadas e cinco veces máis hectáreas calcinadas polo lume neste 2022 conforman un cóctel preocupante por se determina un cambio de tendencia. O fenómeno non é só español, senón que afecta á Europa mediterránea.

Os encoros están esta fin de semana nun 37 %, só un punto e medio menos que hai sete días polas choivas das treboadas. Pero o estrés hídrico afecta agora mesmo ao 75 % do territorio español e faino, obviamente, máis vulnerable aos incendios forestais; é dicir, máis inflamable.

Algúns expertos alertan estes días de que o cambio climático pode xerar nun futuro próximo un colapso hídrico en España coa xestión actual da auga. Converterse na horta de Europa implica un alto prezo, sobre todo no sur do país. Un dato sorprendente é que o 82 % do total da auga doce vai para usos agrícolas e gandeiros, un 13 % para uso humano en cidades e outros núcleos de poboación e o 5 % para a industria. Nun ano con sucesivas ondas de calor, o reto da auga parece máis urxente.