Vinte detidos supostamente relacionados coa construción de planadoras para o narcotráfico

A operación da Garda Civil e a Policía Nacional contra unha organización criminal dedicada á construcción de embarcacións destinadas ao narcotráfico comezou de madrugada cun importante dispositivo que se despregou en distintas localizacións do Salnés, para o que empregaron tamén helicópteros.

Ata o de agora hai unha vintena de detidos, 15 deles en Galicia, e a maior parte na comarca do Salnés, segundo fontes da Policía Nacional. Oito en Cambados. Entre os detidos está Ramón Bugallo Martínez, alias Mon, curmán de Sito Miñanco. Fora detido en 2009 por participar no transporte de máis de dúas toneladas de cocaína.

Os axentes realizaron un total de 27 rexistros en vivendas e naves. A metade deles, 15, foron nas vilas galegas de Cambados, Vilagarcía de Arousa e Ribeira. O resto foron en Salamanca, nas concellos madrileños de Torrejón, Alcobendas e Arganda del Rey, e tamén en Barcelona, Sant Feliu de Llobregat e Martorell. Os dous últimos realizáronse en Portugal. 

Na operación interviñéronse embarcacións, moldes para fabricalas, cartos en efectivo e outros efectos presuntamente destinados á actividade ilícita investigada.

Está previsto que os arrestados pasen á disposición xudicial o venres no Xulgado de Instrucción número 4 de Cambados, que leva o caso.