Utilizan maquinaria adaptada para salvar a colleita de millo na Terra Chá

Boa parte da colleita de millo na Terra Chá podería quedar sen recoller. As leiras, coma estas do Matodoso, en Castro de Rei, están enchoupadas, e a maquinaria convencional non pode traballar nelas. Por iso, houbo que recorrer a máquinas equipadas con eirugas e tractores xeminados para salvar o que se poida. 

"Buscamos unha solución porque hai moitos gandeiros que aínda non recolleron, e a perda é moi grande.", explica Luís Campos, de Agrícola Eustaquio.

Estas máquinas poden salvar a colleita, pero son lentas. Por exemplo, esta leira de tres hectáreas, que, en condicións normais, está recollida en dúas horas e media, desta volta vai precisar oito horas de traballo. Ademais, van contra o reloxo porque o millo xa madurou de máis.

"A colleita prometía moito. Pero non conseguimos sacala porque a terra está moi mollada dende hai semanas.", sinala Antonio Balado, produtor de millo.

A chuvia da primavera adiou a sementeira e os temporais a recollida. Por iso, quedan milleiros de hectáreas de millo sen recoller na Terra Chá, cando a estas alturas xa deberan estar coa herba sementada. E é que xa se sabe que "ano bisesto, promete e non dá".