Veciños atemorizados pola conflitividade con outro habitante dunha aldea de Amoeiro

En Monte Asnal, concello de Amoeiro, hai media ducia de veciños, desesperados pola mala relación con outro. Din que lles fai a vida imposible.

"Téñolle medo, porque xa me sacou tres veces unha navalla, baixa os pantalóns e di 'chúpame aquí'..., insultos e de todo, de todo". "É moi triste vivir na túa aldea e ter que encerrarte na casa porque tes medo". "O meu fillo teno ameazado de verdade, que cando o atope nun camiño córtalle o pescozo", comentan tres veciñas.

Todos o teñen denunciado nalgunha ocasión, algún máis dunha vez. O último xuízo tívoo a pasada primavera, pero non se resolveu.

"En abril houbo un xuízo, pero suspendeuse polas condicións en que estaba el, á espera de que o cite un forense, pero aínda estamos esperando. Non sabemos nada", explica José Benito, un dos veciños afectados.

O denunciado, Ángel, négao todo.

"É mentira, mentira!. Son eles os que me están acosando", asegura.

Vive con seis cans e di que nalgunha ocasión llos intentaron envelenar. Non está disposto a ingresar en ningún centro.

"Eu teño probas médicas por unha discapacidade, non me dan ataques de nervios nin nada", di Ángel.

Pero os veciños insisten. Din que o fan polo seu ben.

"Nós o que queremos é que este rapaz, nas condicións nas que está, de pasar fame e situación insalubre, que se fagan cargo del". "Eu sempre o dixen: non desexo que lle fagan dano, senón que o coiden", sinalan dous veciños.

Temen que ocorra algunha desgraza se non se toman medidas a tempo.