Veciños de Betanzos denuncian os ruídos nocturnos nunha rúa
Veciños de Betanzos denuncian os ruídos nocturnos nunha rúa
Din que os locais incumpren a normativa porque non teñen limitadores de son
Aseguran que levan anos co problema e que o Concello non resolve a situación
A rúa Rosalía de Castro de Betanzos vai camiño de converterse no muro das lamentacións. As pregarias dos veciños son relativas ao descanso e non se dirixen a Deus, senón aos hostaleiros.
"Están incumprindo a normativa porque ningún dos locais ten limitadores de son", di Amelia Naya, presidenta da Asociación de Veciños Rosalía de Castro.
En 80 metros de rúa hai catro pubs e unha discoteca. Para uns, diversión asegurada. Para outros, ruído e falta de descanso garantida.
"Nunha ocasión viu a Policía Local e recoñeceron que as vigas vibraban. E son un terceiro...", comenta unha veciña.
Os veciños reclaman o seu dereito ao descanso. Queren que sexa compatible poder durmir co traballo dos empresarios de ocio nocturno. Para iso, o Concello debe comprobar se os locais están ben insonorizados e teñen medidores de son.
"Sempre nos poñen escusas e non fan nada. Imos seguir coa nosa loita denunciando nos xulgados", avisan.
O Concello di que reforzaron a vixilancia e a limpeza na zona e que hai un proxecto de mellora pendente de licitarse.
