Queixa por un 'chiringuito' de Fisterra: "Ao solpor isto é unha feira de luz e ruído"

A casa de Carmen e este chiringuito fisterrán comparten, porta con porta, unha das vistas máis privilexiadas da Costa da Morte. O conflito comeza a partir das seis da tarde, cando, segundo esta veciña, o ruído, as luces e os cheiros da cociña do local fan que a convivencia se volva insoportable.  

"Xera moitísimo ruído, de copas, de pratos, de nenos gritando, a música vai e vén segundo lles apetece. Ademais o extractor de fumes está orientado cara á nosa parcela, é un cheiro a frito insoportable", di Carmen Mellado, a veciña denunciante.

Cada día pon unha denuncia no Concello de Fisterra, mesmo reportou o caso á Valedora do Pobo, pero polo momento, ninguén lle deu solución. 

"Eu non teño nada en contra da xente que fai o seu agosto e se lucra cun negocio, pero non pode ser a costa do meu descanso e de que eu non poida estar na miña casa. Eu quero ver as licencias que teñen, ata o momento non logrei que mas ensinaran. Eu quero velas, o tema está xa no contencioso administrativo", engade Carmen.

Desde o local declinan falar diante da cámara, pero aseguran que teñen todos os permisos en regra, do contrario, din, non estarían traballando. Insisten en que pechan antes da medianoite e que non poñen música nin organizan actuacións en directo. 

Agora a xustiza será a encargada de dirimir este conflito de convivencia veciñal con vistas ao paraíso.