Vertex transformará en Curtis máis de 100.000 toneladas de xurro en biometano

A empresa Vertex Bioenergy impulsará unha nova planta no municipio coruñés de Curtis en que, "aproveitando as sinerxias coa actual planta de produción de bioetanol", espera transformar máis de 100.000 toneladas ao ano de excedentes de xurro e outros residuos en biometano renovable.

Así, tal e como detallou a compañía nunha nota de prensa, con esta acción prevé un investimento de 12 millóns de euros e a creación de ao redor de 30 postos de traballo, entre emprego directo e indirecto.

A posta en funcionamento espérase para o 2025 e "contará coas máis innovadoras tecnoloxías para a xestión e valorización da materia prima". Así mesmo, explicou que co arranque da planta poderanse xerar case 6 millóns de metros cúbicos normais (Nm3) de biogás, que equivale ao consumo de gas de 8.500 vivendas ao ano.

O gas producido inxectarase á rede, posto que a parcela xa conta con conexión. Ademais deste gas renovable, na planta producirase fertilizante orgánico concentrado.

Responsables da entidade recibiron este martes á conselleira de Economía e Promoción do Emprego en funcións. María Jesús Lorenzana destacou que a nova planta é "unha clara aposta pola economía circular, que beneficia directamente á industria gandeira e agroalimentaria" no que respecta "á valorización e xestión de residuos".

Segundo comunicou a Xunta, Lorenzana avanzou que é unha iniciativa que entra dentro do plan de aceleración de proxectos industriais da Xunta, polo que "o importante é que haxa ese acompañamento que se vai dar, por suposto, por parte do Goberno", porque, engadiu, entenden que "esta nova planta, que a idea é que a finais de 2025 xa estea operativa, non sufra ningún tipo de atranco nin de burocracia excesiva". "Imos estar para darlle a maior celeridade", apuntou.