Vigo renuncia á auga do encoro de Zamáns en beneficio de Nigrán e Baiona

O Concello de Vigo deixará de utilizar auga do encoro de Zamáns para manter no posible as reservas desta presa que fornece principalmente os municipios de Nigrán e Baiona.

Os municipios do Val Miñor lanzaron estes días unha voz de alarma. Din que se non chove nun prazo de dous meses poden quedar sen subministración. Ante esta perspectiva o concello de Vigo decidiu deixar de utilizar auga de Zamáns.

Os 19.000 cidadáns de Vigo que recibían auga de Zamáns recibirana a partir de agora da ETAP do Casal. Así o afirmou este xoves o alcalde, Abel Caballero, tras a reunión que mantivo cos seus homólogos de Baiona e Nigrán, Carlos Gómez e Juan González, respectivamente, para tratar a cuestión da seca pola falta de auga.

Segundo Caballero, Vigo decidiu reducir nun 45 por cento a auga que toma de Zamáns en xaneiro, decisión que evitou, dixo, que Zamáns estea agora baixo mínimos.

Segundo o alcalde, Vigo ten tamén un problema de auga, porque Eiras, que abastece a unhas 700.000 persoas equivalentes ao incluír a industria, aínda que está ao 78 por cento, verá descender moi rapidamente o seu nivel se non chove nos próximos meses.

Desta situación é culpable a Xunta de Galicia, desde o punto de vista de Caballero, o cal asegura que “Nigrán e Baiona van quedar sen auga e a Xunta de Galicia aplaudirá” porque é o que está a desexar.

Caballero expresou a súa “condena enérxica” á actitude do presidente da Xunta, Alfonso Rueda, e da conselleira de Infraestruturas, Ethel Vázquez, por non reunir persoalmente aos alcaldes dos municipios da área afectados pola seca.

Tamén dixo que a Xunta tivo desde 2013, ano da primeira seca, para resolver o problema “excepcionalmente grave” que teñen a área de Vigo e singularmente Baiona e Nigrán coa auga, pero que non fixo nada.

O alcalde convocará a semana que vén aos rexedores dos concellos da área que se abastecen de Eiras para acordar medidas contra a seca.