Jorge Prado, segundo en Lombok, logo dunha espectacular loita con Febvre

Jorge Prado non puido conseguir a vitoria no MXGP de Lombok despois dunha pechada e vibrante loita con Romain Febvre. Prado non puido co francés na segunda rolda. Os dous pilotos protagonizaron un espectacular man a man. Porén, Prado aumenta en dous puntos a súa vantaxe sobre Febvre grazas á carreira de cualificación. Ten 103 puntos de renda.

Jorge Prado conseguiu un espectacular triunfo na primeira rolda do MXGP de Lombok, en Indonesia. Saíu no cuarto posto e foi remontando ata o cara a cara final con Romain Febvre. A dúas voltas do final adiantou ao francés nunha incrible manobra en que as dúas motos estiveron a piques de tocarse.

Rubén Fernández non tivo tanta sorte. Realizou unha excelente saída e colocouse axiña no segundo posto por detrás de Febvre. Posteriormente tivo unha caída e unha saída de pista que lle fixeron perder posicións diante de Coldenhoff e Seewer. Precisamente con este último protagonizou durante varias voltas unha bonita loita con adiantamentos mutuos.

Na segunda rolda repetiuse practicamente a situación. Man a man entre Fernández e Seewer con triunfo final para o suízo. Fernández tivo que conformarse co 5.º posto na rolda e no Gran Premio. Válelle poara ascender ao terceiro posto do Mundial, cun só punto de vantaxe sobre Seewer.