Viveiro gaña a primeira Olimpíada Escolar Nacional de Seguridade Viaria

Cinco grupos de quinto de primaria compiten por ser os que máis saben de seguridade viaria. Un equipo vén de Madrid. "Dixéronnos que iamos vir competir, elixíronnos a seis e aquí estamos", di Ahmad. Hai outro de Navarra, outro de Viveiro... e dous que xogan na casa. "E viñemos aquí a pasalo ben, divertirnos e dalo todo", explica Ainara

En Narón levaban cinco anos con estas olimpíadas a nivel municipal e agora deron o salto nacional impulsados pola Federación de Autoescolas. "O que ten de bo é que os nenos son esponxas e serve de reflexo, tamén educan os pais", di a representante da Federación de Autoescolas de Navarra. "A través desta educación aprenden cidadanía, medio ambiente, comportamento na rúa..."engade o responsable de educación viaria do concello.

A lección semella ir callando entre a cativada. "Conciéncianos aos nenos da importancia da seguridade viaria e obríganos a aprender cousas importantes para evitar accidentes", di Noa. Cada equipo ten ben identificadas as súas fortalezas e debilidades. "A nós dánsenos mal as matemáticas", lamenta Iago, e Beltrán gábase: "O inglés dásenos moi ben".

Déronselles ben máis probas: foi o equipo do colexio Lois Tobío de Viveiro o que quedou primeiro nesta competición olímpica, pero, o que é gañar, gañaron todos.