O San Xoán volveu acender a noite en todas as cidades e vilas do país
O San Xoán volveu acender a noite en todas as cidades e vilas do país
Máis de 125.000 persoas celebraron a noite máxica na Coruña
Nigrán vibrou coas cacharelas e a música
A cidade da Coruña volveu ser epicentro do San Xoán galego. Tras dous anos sen celebración por mor da pandemia, o lume e a festa volveron ás praias coruñesas. Como é tradición, familias na de Riazor, xuventude na do Orzán.
E como xa se prevía, a celebración foi multitudinaria. Nin sequera a ameaza de chuvia e as pingueiras intermitentes frearon as ganas de xolda. Concedéronse máis de 700 permisos só nesta cidade para prender cacharelas e facer grelladas.
Volveron os saltos ás fogueiras, o de pedir os desexos dándolle o lombo ao mar, o de deixar o malo atrás, máis ca nunca este ano. Pero non só nos areais. Os paseos estiveron ateigados de xente ata ben entrada a noite. O mellor de todo, que non houbo incidentes.
No sur de Galicia, moito lume tamén na praia de Panxón, en Nigrán. E música para amenizar a noite máxica. Calculan que unhas 30.000 persoas participaron deste san Xoán de regreso á normalidade.
Desde o Concello facían un chamamento á diversión, pero tamén á responsabilidade.
A chuvia si frustrou a festa noutros concellos. No de Pontevedra, obrigou a suspender a cacharela máis importante e en Marín pospúxose a de Cantodearea para mañá.
