A Xunta ve no recurso á lei do litoral unha mostra da "desigualdade" de trato con Galicia

O presidente da Xunta, Alfonso Rueda, considerou que o recurso de inconstitucionalidade presentado polo Goberno central contra a lei de ordenación o litoral de Galicia, que onte foi admitido a trámite, unha mostra da "enorme desigualdade de trato" do Goberno central con Galicia.

En declaracións durante a inauguración do V Congreso Internacional CIOS, en Santiago de Compostela, lembrou o feito de que "cousas tremendas que teñen que ver coa amnistía, a autodeterminación, con indultos a persoas mesmo acusadas de terrorismo" para o Goberno central caben na Constitución pero non lexislar sobre o litoral galego.

Segundo Rueda, a lei do litoral galega conta con ditames a favor da Asesoría Xurídica da Xunta, do Consello Consultivo de Galicia e de expertos constitucionalistas, mentres que o Goberno central considera esta lexislación "case como unha declaración de independencia".

Algo que non só lle parece "tremendo" e sobre o que cre que hai que reaccionar "con toda a forza", senón tamén "unha mostra máis da enorme desigualdade de trato" do Goberno central que "para traspasar a investidura é capaz de traspasar todas as liñas vermellas con algúns e con outros ser tremendamente duro", dixo.