Alfonso Rueda: "Galicia é un clamor máis alá de posicionamentos políticos"

Miles de persoas saíron ás rúas das catro capitais de provincia galegas convocados polo PP para protestar contra os pactos do PSOE cos independentistas para a investidura de Pedro Sánchez.

Segundo o PPdeG, máis de 30.000 persoas acudiron ás distintas concentracións, con Pontevedra e A Coruña como as máis multitudinarias, con 10.000 persoas en cada cidade.

Ademais, fronte á Subdelegación do Goberno en Lugo concentráronse máis de 4.000 persoas, do mesmo xeito que na chaira do Auditorio municipal de Ourense.

Con todo, a Delegación do Goberno rebaixa esta cifra a uns 13.000 asistentes. En concreto, segundo fontes consultadas por Europa Press, 6.500 persoas concorreron á concentración da Coruña; 4.000 á de Pontevedra; 2.500 á de Lugo; e 300 á de Ourense.

Rueda en Pontevedra

Con berros de "Puigdemont a prisión" e "España non se vende" arrancou a concentración de Pontevedra, á que asistiu Alfonso Rueda, acompañado por Ana Pastor e os conselleiros de Educación e Sanidade, entre outros cargos do partido na provincia.

Leu o manifesto o gañador do Tour de Francia, Óscar Pereiro, en representación da sociedade civil, un texto que rematou coa frase "Galicia non se rende".

O líder dos populares galegos destacaba que estas protestas non son só unha mobilización do PP, senón unha demostración da indignación da xente contra os acordos para a investidura de Pedro Sánchez.

"Hai un presidente do Goberno en funcións, que aspira a selo outra vez, que por puro interese persoal está a partir o país, a partir España. Dende Galicia isto é un clamor e vai moito máis alá de posicionamentos políticos. É un sentimento cidadán de que a igualdade que levamos desfrutando dende hai corenta anos non se pode poñer en cuestión pola ambición dunha persoa. E iso é o que se está a dicir de xeito pacífico, democrático", declarou Rueda.

Mesma imaxe na Coruña, concentración na que participou o vicesecretario nacional de Organización do PP, Miguel Tellado. Á mesma hora, repetíanse lemas nas protestas convocadas na explanada do Auditorio Municipal de Ourense e diante da Delegación do Goberno en Lugo.