Arnaldo Otegi anuncia que non será o candidato a lehendakari de EH Bildu
Arnaldo Otegi anuncia que non será o candidato a lehendakari de EH Bildu
"O meu sitio non está no Parlamento", asegurou o coordinador xeral da formación abertzale, quen dixo que hai un ano que tiña tomada a decisión
O coordinador xeral de EH Bildu, Arnaldo Otegi, anunciou este luns que non será o candidato a lehendakari da formación abertzale nas próximas eleccións autonómicas.
O líder abertzale confirmou que non se presentará nunha conferencia de prensa celebrada en San Sebastián tras informar da súa decisión á Mesa Política de EH Bildu. "O meu sitio non está no Parlamento", afirmou.
Otegi, que dixo que tiña a decisión tomada desde hai máis dun ano, aclarou tamén que non deixará a primeira liña da política, xa que se presentará o próximo ano como candidato a ser reelixido como coordinador xeneral de EH Bildu.
Con todo, argumentou que resulta necesario deixar a substitución a unha "nova xeración" que encarna os "valores emerxentes da sociedade vasca".
A decisión de non presentarse faise pública apenas dous días despois de que o seu principal opoñente político, o PNV, anunciase ao seu candidato a lehendakari, Imanol Pradales, nunha aposta de renovación que tamén levará a cabo EH Bildu.
