Máis de 100 descendentes de galegos atoparon traballo co Programa Retorna

O obxectivo do programa Retorna Cualifica Emprego é atraer o talento da emigración para incorporalo ao mercado laboral galego. O balance do primeiro ano é positivo.

 "Hai uns 5.000 inscritos no programa. Contamos con arredor de 200 empresas interesadas que presentaron vacantes e a día de hoxe hai sobre 110, 115 persoas xa traballando aquí en Galicia e retornadas" informa Diego Carbajosa, director da área internacional da Fundación Nortempo.

Os galegos emigrados e os seus descendentes teñen a oportunidade de retornar cun contrato na man. A Xunta págalles incluso o billete de volta.

 "Dende que cheguei estanme formando. Entrei directamente nunha escola. Gradueime cun título de elaboración de alimentos e chamáronme para unha entrevista de traballo, que penso ir coa miña nai agora, a ver que tal", conta Yovani Chacón, descendente de emigrantes galegos en Cuba.

Yovani é un dos últimos incorporados ao programa. Florencia foi a primeira e xa leva meses traballando.

 "A verdade é que xa tiña a idea hai bastante tempo de poder vir a Galicia e asentarme xa tamén coa miña familia, e cando vin o programa era a oportunidade perfecta para vir, traballando, que é unha das cousas que máis lle preocupan a un cando ten que pensar en emigrar", apunta Florencia Teijeiro, illa de emigrante galega na Arxentina.

O foro celebrado hoxe estivo enfocado a buscar traballadores para turismo e hostalería, dous sectores que demandan moita man de obra.

 "Temos que insistir en intentar captar talento e intentar captar persoas que crean no noso sector, que é moi importante, porque estamos falando do 12 % do PIB de Galicia", conta César Ballesteros, presidente da Federación de Empresarios de Turismo e Hostalería de Pontevedra

"Que se animen, que veñan, que realmente Galicia é un lugar moi fermoso e acolledor para que poidan emprender unha nova vida" anima Florencia Teijeiro, filla de emigrante galega na Arxentina.