Inquedanza entre os veciños de Vigo por un narcopiso
Inquedanza entre os veciños de Vigo por un narcopiso
Os veciños aseguran estar a vivir un calvario, con temoridade de que ocorra unha desgraza maior
As denuncias á policía e ao Concello non son suficientes para desaloxar o edificio ocupado
Un narcopiso na rúa Pizarro, xusto ao carón da gardería da Cidade da Xustiza, provoca preocupación e inquedanza entre os veciños de Vigo. A Asociación de comerciantes da contorna do antigo hospital Xeral leva tempo denunciando a situación deste inmoble abandonado e ocupado ilegalmente.
A veciñanza está farta dos roubos e ameazas que sofren por parte dos usuarios do edificio, ademais da venda de drogas que se produce ás portas dos xulgados da cidade viguesa. Explican que na zona hai pelexas e conflitos constantes, mesmo co emprego de armas brancas.
A presidenta da Asociación de comerciantes da contorna do Hospital Xeral, Rosa Vello, comenta que os comercios e centros escolares que se concentran na contorna da Cidade da Xustiza "pagan as consecuencias polo aumento da delincuencia na zona."
Pola súa banda, os propietarios do inmoble non asumen o seu cargo, e malia as repetidas denuncias ante a policía e o Concello, os veciños non conseguen desaloxar este narcopiso para acabar dunha vez coa crecente violencia no barrio. Aseguran que están vivindo un auténtico calvario, temendo que suceda unha desgraza en calquera momento.
