'Mambrú volveu da guerra', de Carlos Labraña, premio SGAE de Teatro Infantil 2022
'Mambrú volveu da guerra', de Carlos Labraña, premio SGAE de Teatro Infantil 2022
É o primeiro texto en galego que gaña o certame da Fundación Sociedade Xeral de Autores e Editores
A SGAE salienta da obra de Labraña o "seu fondo de recoñecemento á memoria histórica", cunha gran dozura literaria e escénica
Labraña sinalou que escribiu o texto desde a emoción, "e volvo emocionarme cando o releo"
Carlos Labraña, gañador do XXIII premio SGAE de Teatro Infantil 2022 / FOTO: SGAE
O dramaturgo galego Carlos Labraña foi galardoado co Premio SGAE de Teatro Infantil 2022 pola súa obra 'Mambrú volveu da guerra'. É o primeiro texto en lingua galega que gañou o certame da Fundación Sociedade Xeral de Autores e Editores.
Carlos Labraña Barrero impúxose a outros 39 orixinais polo seu "fondo de recoñecemento á memoria histórica", segundo apuntou a institución este luns, e a todos aqueles esquecidos en "cunetas e tapias de cemiterios", cunha gran dozura literaria e escénica.
Labraña sinalou que escribiu o texto desde a emoción, "e volvo emocionarme cando o releo", engade que a dificultade maior era tratar a historia con delicadeza, pero sen ocultar nada.
O dramaturgo galego, nado en Cedeira en 1969 e con ampla experiencia como autor de teatro infantil, di que se sente moi agradecido por recibir un premio tan importante e con tanto alcance para un xénero tan minorizado como a dramaturxia para nenos e nenas.
O galardón está dotado con 8.000 euros, a publicación da obra na serie editorial Sopa de Libros que a Fundación SGAE coedita xunto co Grupo Editorial Anaya e a súa escenificación no 27º Ciclo SGAE de Lecturas Dramatizadas 2023.
A obra gañadora relata como unha nena chamada Xana chega a un parque infantil recentemente construído nos arredores da vila. Alí atopa a única compañía dun vello soldado de porcelana que alguén esqueceu. A partir desta formulación, Labraña constrúe un relato que reivindica a memoria histórica e lévanos, segundo o xurado do premio, a "un belo e inesperado desenlace".
O dramaturgo sinalou que "a nosa obriga é loitar contra o esquecemento" e satisfaino que este premio llo dean precisamente agora, coincidindo coa entrada en vigor da Lei de memoria democrática en España. Incide na importancia de contar estas historias aos nenos e nenas, dun modo poético, pero sen ocultar nada.
"Recuperar os nomes e as historias do esquecemento é darlles vida de novo, pero tamén é darnos vida a nós mesmos".
