Detidos seis afeccionados da U. D. Ourense por agredir un traballador da hostalería

Seis homes vinculados pola Policía Nacional a un grupo ultra da cidade de Ourense foron detidos por agredir un traballador do sector da hostalería por "motivos ideolóxicos".

Nun comunicado, a Policía Nacional explica este martes que os feitos se remontan á madrugada do 3 de xuño de 2023, cando un grupo de persoas encapuchadas agrediron un home na praza do Ferro.

Segundo a Policía, tras meses de investigación foron identificados os seis responsables deste episodio, que son "integrantes dunha coñecida pena deportiva composta por seareiros radicais da Unión Deportiva Ourense chamada Ouligans, concretamente a unha facción da mesma denominada Ouligans Vandal Crew".

Os investigadores sosteñen que a agresión "puido estar orixinada por motivos ideolóxicos" e non se produciu "de forma casual", senón que fora "planificada" polos seus autores "pola suposta vinculación ou pertenza da vítima a grupos ou ideoloxía de extrema dereita". O grupo, continúa o relato policial, convocou aos seus integrantes "que estivesen dispostos a arrasar", é dicir, "a levar a cabo a acción", que consistiu en achegarse por detrás á suposta vítima despois de "increpalo en dúas ocasións, buscando a provocación para que o feito parecese ser un altercado espontáneo ou casual".

Segundo a Policía, os agresores "pretendían que a vítima tivese claro" que a agresión, que lle provocou "feridas graves no corpo e a cabeza", "estaba motivada pola súa presunta ideoloxía nazi".