A avaricia do atracador frustra o atraco nun banco de Soutomaior
A avaricia do atracador frustra o atraco nun banco de Soutomaior
A pericia do director da oficina e a súa calma foron decisivas á hora de deter o asalto
En Soutomaior non se fala doutra cousa: o intento de atraco perpetrado nunha oficina bancaria que logrou frustrarse grazas á calma do director, á rápida intervención da Garda Civil e tamén á avaricia do asaltante. Foi detido e mañá pasará a disposición xudicial.
Unha fotografía tirada por un veciño recolle o momento da detención do presunto atracador tras intentar asaltar a oficina bancaria situada na Avenida Alexandre Bóveda de Soutomaior. Minutos antes das 2 da tarde accedeu á entidade, vestido de traxe, cunha perruca e barba falsas e xa suscitou desconfianza entre os veciños.
No interior da entidade estaban o director e un cliente. Ameazounos cunha arma simulada e atou o cliente cunhas bridas. Esixiu os cartos da caixa, e non satisfeito co botín, ordenou que lle abrise a caixa forte. Tirando de calma e valor, o director activou a alarma e distraeuno ata que chegou a Garda Civil.
As sirenas das patrullas alteraron a tranquilidade da veciñanza. A Paula sorprendérona mentres ultimaba a apertura da súa florería ao carón da oficina bancaria e levou o susto da súa vida. Andrea, que rexenta un bar a uns 100 metros, saíu correndo co balbordo.
O presunto asaltante é un ourensán de 66 anos. Permanece detido na comandancia da Garda Civil en Pontevedra. Mañá pasará a disposición xudicial en Redondela.
