A confraría de Noia comeza a sementeira de ameixa babosa do seu criadeiro

O proceso comeza nunha batea na que se atopan os exemplares que se van usar para a sementeira. Despois de medio ano engordando nas profundidades, os traballadores levantan as estruturas e pasan as ameixas aos canastros. Toda esta semente naceu no criadeiro que a confraría ten en Outes.

"Vén todo do criadeiro. Quitamos pais e nais dos nosos bancos, os biólogos fan larvas, semente, aliméntanas un tempo e logo van ao engorde na batea", comenta Santiago Cruz, patrón maior da confraría de Noia.

"Chegan con 2 milímetros á batea e saen con 12 ou15, o talle recomendado para sementar, cando xa ten a cuncha máis dura", explica Antonio Rama, biólogo do criadeiro. 

A estrutura, de bandexas apilables envoltas cunha rede, permite que a cría se alimente sen correr riscos. Ao estar fonda tampouco padeceu o exceso de auga doce do inverno. Agora é o momento de que sobreviva en condicións naturais.

Hoxe van sementar un millón e medio de unidades de ameixa babosa, unha das especies que máis descendeu nos últimos anos. Despois do tempo de engorde na batea, xa ten o tamaño suficiente para se defender dos depredadores. 

Bótana a eito desde os barcos sobre os bancos marisqueiros menos produtivos. A idea é repoboar antes de que se esgote o recurso.

"Queremos axudar a rexenerar os bancos, aumentar un pouco a produción e, sobre todo, ter futuros reprodutores no medio", engade Antonio Rama.

"Isto da sementeira é para axudar, todo depende do desove natural que fagan os reprodutores nos bancos de Noia, e que haxa unha boa climatoloxía", di o patrón maior.

Agardan que desta volta a natureza axude, e que a cría chegue a adulta despois de dous anos catastróficos para os 1.400 mariscadores da ría de Muros e Noia.