A Fiscalía eleva a 29 anos de prisión a petición de condena para o acusado do crime en Oza-Cesuras
A Fiscalía eleva a 29 anos de prisión a petición de condena para o acusado do crime en Oza-Cesuras
A fiscal actualizou a petición de condena tras confirmar que o home perseguiu a vítima ata o seu domicilio antes de matala
![](https://img-g24-crtvg.flumotion.com/prog24/2023/20231117/XUIZOCRIMEOZA-CESURAS.duplicate_frame_377.png)
A Fiscalía eleva a 29 anos de cárcere a petición de condena para o acusado de matar unha muller na súa vivenda de Oza-Cesuras en xaneiro de 2021. O procesado enfróntase a case tres décadas de prisión por delito de asasinato, tenencia ilícita de armas e, como confirmou a fiscal este luns na lectura de conclusións, por violación de morada.
A representante do Ministerio Público confirmou, na vista celebrada este luns, que o acusado perseguiu á muller "e no momento que lle dá alcance, nese mesmo lugar, apúntaa coa arma, dispáralle e mátaa". Desta forma a fiscal actualizou a súa petición de condena para o acusado, sumando un ano máis por violación de morada.
O procesado, para o que o seu defensa solicita entre dous e cinco anos por roubo, mostrouse "arrepentido por ir roubar a esa casa" e tamén quixo pedir "perdón" á familia da vítima na súa quenda de última palabra, no xuízo celebrado na Audiencia Provincial da Coruña.
Ademais, o procesado engadiu que "non sabía que o compañeiro que viña comigo ía armado senón non fose nin a esa casa nin a ningunha outra", declarou o acusado. Respecto a este último argumento do acusado, a fiscal sinalou que non se puido "acreditar nunca a súa presenza, sinxelamente, porque esta persoa non existe". A acusación particular subscribiu "integramente" estas conclusións da Fiscalía "respecto ao ocorrido".
Pola súa banda, a defensa mantivo o seu relato inicial en que reclama de dous a cinco anos por tentativa de roubo con violencia en casa habitada para o seu cliente, quen se declarou culpable de acceder á vivenda para roubar pero non da morte da muller. Ademais, o letrado fixo alusión á presenza de sangue doutro home no chaleco do procesado e á ausencia de residuos de disparo nas súas mans.
Os feitos
O xuízo celebrado na Audiencia Provincial da Coruña, con Tribunal de Xurado, polos feitos ocorridos na tarde do 15 de xaneiro de 2021, concluíu que o procesado accedeu de maneira sorpresiva e armado á vivenda, perseguindo á muller ata disparala no cranio. Tras os feitos, o home foi detido oculto nunhas matogueiras, con abundantes manchas de sangue na súa roupa.
No seu escrito de cualificación, o Ministerio Público explica que a vítima "se atopaba fráxil e convalecente dunha operación á que fora sometida esa mesma semana".
Inicialmente as hipóteses da investigación centráronse en que o home entrou na vivenda coa intención de roubar e puido ser sorprendido pola muller. Con todo, esta posibilidade descartouse, apuntando a que o acusado, veciño de Culleredo, a coñecía.