A Garda Civil apresou máis de 40 kg de ameixa e 120 kg de centola ilegais en Fisterra
A Garda Civil apresou máis de 40 kg de ameixa e 120 kg de centola ilegais en Fisterra
No marco do Plan Integral de Actividades Pesqueiras do Servizo de Protección da Natureza (Seprona), axentes da Patrulla do Seprona de Corcubión levaron a cabo un
operativo especial de prevención do furtivismo, en que se apresaron 40,7 kg de ameixa na praia de Langosteira e 120 kg de centola no porto de Fisterra.
Operativo na praia de Lagosteira
A atención dos axentes centrouse en dous individuos que se achegaron á auga, un deles equipado con traxe de neopreno e equipo autónomo de mergullo. Mentres o mergullador realizaba a extracción, o outro individuo, identificado como a súa esposa, patrullaba a zona para asegurarse da ausencia de vixilancia.
A patrulla do Seprona centrou a vixilancia no tramo de praia onde entrou no mar o mergullador, e abordou ambas as dúas persoas cando este se dispuña a saír. Ao notar a presenza da Garda Civil, o mergullador tentou regresar á auga, pero foi interceptado por un dos axentes. Procedeuse á incautación de 40,7 quilos de ameixa que foi retornada á zona de extracción en presenza do denunciado. Ademais, quedaron confiscados o equipo autónomo de mergullo e o traxe de neopreno.
Actuación no peirao de Fisterra
Noutro operativo, axentes do Seprona de Corcubión detiveron un vehículo isotermo, que fora observado descargando capturas desde unha embarcación no porto de Fisterra. O vehículo, que transportaba 120 quilos de centola sen a documentación correspondente, foi detido e instouse ao denunciado a transportar a mercadoría ao porto de Sardiñeiro, onde foi devolta ao mar pola patrulla na súa presenza.
En ambos os dous casos interpuxéronse denuncias administrativas segundo a Lei de Pesca de Galicia e o Real Decreto 550/2020 do 02 de xuño, por realizar unha inmersión nocturna sen autorización e por carecer da boia de sinalización requirida no caso das ameixas.
