A maioría dos tractores antiguos carecen de barras antienvorco, pero poden instalarse

Galicia ten un dos parques móbiles de vehículos agrícolas máis grandes de España, pero tamén un dos máis obsoletos. Gran parte deles carecen de sistema de protección antienvorco.

A lei, que hai tres anos entrou en vigor, permite seguir utilizando os tractores de máis de 40 anos sen estrutura de seguridade, pero está prohibida a súa venda agás que se reforme e se instale unha protección antienvorco homologada.

José ten un taller en Vilalba de reparación de maquinaria agrícola e dedícase tamén á compravenda. Dende abril do 2020 non se permite a transferencia de tractores de máis de 40 anos, que carezan de protección antienvorco. É o caso do vehículo en que está a traballar hoxe. Púxose en contacto cunha empresa que se dedica a instalar estes sistemas de seguridade. 

Un arco de protección e un novo asento con cinto de seguridade homologados, fabricados e deseñados por unha empresa manchega que ten a patente en España e que darán unha segunda vida a este vehículo agrícola.

Juan Antonio Marín, propietario da empresa que ten a patente,  di que á vez que salvan a vida do vehículo, para non ter ir ao despezamento, en caso de accidente salvaría a vida o tractorista. 

Aínda que funcionan automaticamente, neste caso instalan unha barra de protección que se sobe e baixa manualmente. Máis económica, porque en Galicia hai moita xente que non lle sae á conta facer un investimento importante para traballar unhas poucas leiras.

"Moitos agricultores non están dispostos a investir unha cantidade importante de cartos nun novo tractor que lles custa máis que o produto que sacan das leiras. Este sistema é máis económico e ademais saen seguros ao campo", di Juan Antonio Marín.

Na última década, en Galicia faleceron máis de 200 persoas en accidentes de tractor. A metade das mortes debidas ao envorco do vehículo.