A marea volve afectar outro coche mal estacionado en Muros

A sección de coches somerxibles comezou hai un mes en Muros con este caso e agora chega o segundo episodio. Foi na mesma rampla do porto onde cada día varios condutores tentan a sorte.

A vila é un fervedoiro de xente no verán. Ademais dos turistas, os martes e os venres hai mercado e as opcións para deixar o coche son escasas. 

A rampla en cuestión utilízase para baixar e subir as planadoras. Cando hai mareas vivas, a superficie valeira aínda é máis grande... e máis atractiva para estacionar. Pero o mar sobe cada seis horas e sempre hai alguén que por descoñecemento, desleixo ou descoido esquece o ciclo de mareas e estraga o coche.

Un policía portuario dá indicacións a un condutor

Ollo coas mareas... e coas sancións

Na entrada da rampla en cuestión hai varios sinais de prohibido estacionar. Unha advertencia que convive cun costume moi arraigado nas vilas mariñeiras: deixar o coche nas zonas portuarias. Pasa en Muros pero tamén en Ribeira, Laxe ou Malpica. 

O organismo competente para sancionar os vehículos mal estacionados é Portos de Galicia. No que levamos de ano tramitou 1.013 sancións nos 122 portos que xestiona na comunidade. En 2023 puxéranse 1.545 multas.