O Goberno desautoriza a Pere Navarro e asegura que non pagaremos polo uso das autovías en 2024
O Goberno desautoriza a Pere Navarro e asegura que non pagaremos polo uso das autovías en 2024
O director xeral de Tráfico dixo nunha entrevista este xoves que en 2024 habería que pagar nas autovías "por imposición de Bruxelas", pero despois desdíxose, desculpouse pola confusión creada e dixo que o tema non estaba sobre a mesa
![](https://img-g24-crtvg.flumotion.com/prog24/2023/20230713/AUTOVIAS.png)
A ministra de Transportes Raquel Sánchez desmentiu "categoricamente" que o Goberno "estea a pensar en impoñer peaxes polo uso de estradas".
As súas declaracións producíronse despois de que o director xeral de Tráfico Pere Navarro dixese que España podería iniciar a súa implantación en 2024.
Horas despois da primeira entrevista, o propio Pere Navarro desdíxose e lamentou "profundamente" a "confusión" creada polas súas palabras.
Lembrou que o seu departamento non ten nin información directa nin competencias atribuídas para pronunciarse sobre a implantación de posibles peaxes.
Tras a polémica suscitada por Navarro, a ministra dixo que lle "sorprende moitísimo a hipocrisía do PP".
Lembrou que foi un goberno dese partido o que encargou "estudos para implantar o pago por uso, as peaxes, a partir do ano 2021".
A ministra lembrou que o Goberno do PSOE liberou mil quilómetros de peaxes de autoestradas en España, o que supón que catro de cada dez quilómetros foron liberados dese pago.
As declaracións de Navarro tiveron lugar despois de que o pasado luns, no debate entre o presidente do Goberno, Pedro Sánchez, e o candidato do PP á presidencia, Alberto Núñez Feijóo, este último dixera que o Executivo enviou á UE un escrito coa implantación das peaxes.