A plataforma Xabarín.gal amplía o seu catálogo para fomentar o galego entre os nenos

A plataforma Xabarín.gal amplía desde este Nadal o seu catálogo infantil con películas e series para fomentar o uso do galego entre os nenos.

O Conselleiro de Cultura, Lingua e Xuventude, José López Campos, en compañía do secretario xeral da Lingua, Valentín García, participou este martes, nun acto ante 200 escolares do compostelán centro Pío XII, na presentación dos novos contidos audiovisuais en galego.

Os principais títulos que se sumarán á web e aplicación infantil da TVG serán películas como: 'Sinchan', 'Doraemon', 'Cegoñas', 'Happy Feet' ou 'Lego'; e series míticas como 'Marco' e 'Os Bolechas', ademais dá nova 'Bibopalula', a primeira serie musical en galego.

Tal e como explicou Campos nas súas declaracións, a Xunta iniciou este proxecto de divulgación de man da TVG co obxectivo de "normalizar que os nenos e nenas de Galicia poidan ter contidos de calidade en galego", pois esta é unha das direccións cara á que se move o "pacto da lingua".

Na mesma liña, o conselleiro manifestou que a intención de ambas as entidades é "recuperar a esencia da xeración Xabarín" achegando o audiovisual galego aos máis pequenos dunha forma máis atractiva e mediante as plataformas dixitais que agora se manexan: móbiles, tabletas, computadores e televisión.