A Policía Local de Cabanas multiplica as multas aos que non respectan as zonas de aparcadoiro

Día de Praia en agosto nun dos areais mais concorridos das Rías Altas. "O aparcamento está complicado. Nun día coma o de hoxe ou madrugas moito ou non hai maneira".

Atopar un oco é unha tarefa imposible a partir de media mañá. "Un día saía co coche e o que ocupou o meu sitio levaba unha hora dando voltas para aparcar".

A praia conta cunha zona de estacionamento limitada aos residentes cun horario que vai das dez da mañá as oito da tarde. "Os que estamos aquí todo o ano e pagamos aquí os nosos impostos temos dereito a deixar o coche e vir".

Pero os visitantes aseguran que moitas estas prazas quedan valeiras. "Din os veciños que son necesarias pero logo veñen os coches e se non teñen onde aparcar déixano aí".

E hai quen prefire arriscar e acaba deixando o vehículo mal aparcado aínda a costa de acabar cunha multa da policía local que multiplica as sancións do resto do ano. "Pasan e len a matricula e o que non sexa residente terá que pagar a multa".

Este ano as prazas dispoñibles redúcense aínda mais polas obras de saneamento que se levaron a cabo na zona. A solución, din os veciños, pasa por ordenar todo o espazo. "Ordenar e regular e as empresas que fan obras que teñan o compromiso de deixar a zona como estaba".

As autoridades de tráfico tiveron que botar man da limitación do paso de coches cara ao areal hai unhas semanas ante o bloqueo da zona.