A remonta do Arenteiro non se completa en Tarazona
A remonta do Arenteiro non se completa en Tarazona
Os de Jardiel melloraron na segunda metade tras comezar perdendo, pero non conseguiron igualar o marcador
O novo Arenteiro debutou no Municipal de Tarazona para inaugurar a súa temporada 2024/2025. Un equipo que botaba de menos a ídolos do pasado como Luis Chacón ou Javi Rey viuse lastrado nos primeiros intres. Nunha xogada con moita desgraza adiantáronse os locais no minuto 26'. O gol anotouse para Areso, pero tivo toda a fortuna tras caerlle o rebote nunha ocasión moi clara ante o porteiro. Minutos despois, o Tarazona ampliou distancias no 36 grazas a Cubillas. Nese momento os de Jardiel non mostraban sinais de remonta.
Á volta dos vestiarios o conto cambiou e o Arenteiro, que se ben non comezou como un furacán, foi collendo forza co paso dos minutos. Decisiva foi a xogada de Diego Gómez meténdose polo lateral da área rival e poñéndolle gol en bandexa a Nacho Ramón. Corría o minuto 58 para un Arenteiro que tería que remontar nesa media hora. Intentouno con todo, dominando o balón e buscando sorprender á defensa do Tarazona.
Os ourensáns intentárono, pero o tempo non foi dabondo. As súas últimas esperanzas morreron nunha grande ocasión de Marquitos, que enviou o balón lambendo o pau cando xa saboreaba o empate.
Desta maneira o Arenteiro inicia a competición derrotado en Tarazona. Seguinte partido, o primeiro na casa, recibindo a Cultural Leonesa.
