A xuíza rexeita a posibilidade de liberdade provisoria para Dani Alves
A xuíza rexeita a posibilidade de liberdade provisoria para Dani Alves
A xuíza aprecia o risco de fuga, ao que se engade a inexistencia de convenios de extradición entre España e O Brasil
A súa defensa dispón de cinco días para recorrer a medida
![Dani Alves na súa etapa de xogador do FC Barcelona](https://img-g24-crtvg.flumotion.com/prog24/2023/20230123/danialves.png)
A xuíza que investiga o ex-xogador do FC Barcelona Dani Alves por violar presuntamente unha moza na discoteca Sutton de Barcelona acordou mantelo en prisión, onde ingresou o pasado 20 de xaneiro, tras poñer en dúbida a súa última versión exculpatoria e concluír que persiste o risco de fuga.
A titular do Xulgado de Instrución número 15 de Barcelona, de acordo co criterio da Fiscalía e a acusación particular exercida pola vítima, rexeitaron a petición da defensa do futbolista para que saia en liberdade provisoria mentres se instrúe o caso.
Alves, que permanece en prisión preventiva tras a súa detención en xaneiro, pediu á xuíza que o deixase en liberdade o pasado 20 de abril tras comparecer ante a maxistrada, a petición propia, para dar a súa cuarta versión sobre o sucedido na discoteca Sutton de Barcelona a noite do 30 de decembro.
Nesa comparecencia, o xogador brasileiro admitiu por primeira vez que mantivera relacións sexuais por vía vaxinal coa denunciante e insistiu en que foron consentidas, o que tratou de demostrar achegando unha análise das imaxes que gravaron as cámaras de seguridade de Sutton e que, segundo a súa versión, excúlpano.
A maxistrada, con todo, puxo en dúbida o informe que a defensa presentou como proba pericial e que, ao seu parecer, non é máis que unha proba documental a modo de "reconstrución" do sucedido: "As súas afirmacións nada teñen que ver cos feitos".
Para a xuíza instrutora, transcorridos case catro meses desde a detención de Alves mantéñense os indicios de criminalidade que o involucran na violación, polo que non ve motivos para modificar a súa situación persoal.
Persistencia
Nese sentido, a maxistrada contrapón a "persistencia" da declaración da vítima coas distinta versións que o futbolista deu do sucedido e lembra que a última delas, en que recoñeceu por primeira vez unha penetración vaxinal, ofreceuna cando xa dispoñía dos resultados das probas biolóxicas, que acharon restos de seme de Alves nas partes íntimas da nova.
Outra das cuestións que, en opinión da xuíza, non variaron desde que Alves ingresou en prisión é o seu risco de fuga, que segue sendo o mesmo tendo en cuenta que o futbolista conta con dobre nacionalidade española e brasileira, sen que existan convenios de extradición co seu país de orixe.
A iso súmase, engade o auto, o seu inminente divorcio: a súa esposa, a modelo Joana Sanz, anunciou o mes pasado a través das redes sociais a súa intención separarse del tras oito anos de matrimonio.
A defensa de Alves, exercida polos avogados Cristóbal Martell e Arnau Xumetra, dispoñen de ata cinco días para recorrer a confirmación da prisión provisional do ex-xogador do Barça, ante a xuíza instrutora ou directamente ante a Audiencia de Barcelona.
O pasado mes de febreiro, a Audiencia descartou deixar en liberdade provisoria o futbolista, ao concluír que presenta un elevado risco de fuga, dada a súa "capacidade económica avultada" e porque os indicios que o incriminan son "severos" e "diversos".