A Xunta dá por extinguido o incendio do Saviñao e só quedan dous en Ourense por apagar

Só dous incendios forestais de consideración, ambos na provincia de Ourense, continúan este venres pendentes de extinción en Galicia, con 6.700 hectáreas afectadas, tras extinguir o lume que afectaba ao Saviñao, informa a Consellería do Medio Rural.

Ás 0:46 horas desta noite quedaron apagadas as chamas no Saviñao, parroquia de Rebordaos, tras queimar 19,41 hectáreas, das que 12,3 son de monte raso e 7,11, de monte arborizado, e empezar en polo menos tres puntos diferentes.

Con este incendio terminado, só están pendentes de extinción dous lumes que afectan á provincia de Ourense, dentro do balance que ofrece a Xunta, que só inclúe os que superan as 20 hectáreas ou implican risco para núcleos poboados.

Está controlado desde o xoves o incendio de Vilariño de Conso, parroquia de Pradoalbar, onde arden 6.500 hectáreas que afectan o parque natural do Invernadeiro. Tamén está estabilizado desde o xoves outro incendio en Castrelo de Miño, parroquia de Barral, con 200 hectáreas arrasadas. 

Son, por tanto, 6.700 as hectáreas que aínda están en incendios pendentes de extinción, a cifra máis baixa desde a fin de semana do 16 e 17 de xullo, pois desde entón chegáronse a superar as 30.000, segundo a Xunta, que o satélite Copernicus elevou a preto de 37.000. 

En todos os lumes traballan de forma coordinada medios autonómicos e estatais para avanzar desde a estabilización ao control e, posteriormente, á extinción.