A Xunta pon buses entre Vigo e Santiago polo peche do aeroporto de Peinador

A Xunta anunciou que a partir deste mércores poñerá buses entre Vigo e Santiago de Compostela para atender aos viaxeiros afectados polo peche temporal do aeroporto de Peinador.

O Goberno autonómico explica nun comunicado que habilita este servizo "ante a falta de alternativas para os viaxeiros por parte do Executivo central, que promove a obra na pista" de Vigo.

Peinador está pechado ao tráfico aéreo desde este luns e non terá actividade ata o próximo 31 de maio, cando está previsto que se inaugure a nova pista, na que se invisten máis de 23 millóns de euros.

A liña entre a estación intermodal de Vigo e a terminal compostelá contará con seis servizos ao día, cunha duración aproximada dunha hora e media, e terán saída desde Vigo ás 04:30, 07:35 e 10:45 horas e do aeroporto de Santiago cara a Vigo ás 08:45, 12:40 e 18:45 horas.

O servizo con saída de Vigo ás 04:00 horas permitirá aos usuarios coller os voos da primeira hora da mañá e prestarase cunha nova liña que se crea especificamente e que realizará unha parada intermedia en Pontevedra.

A información relativa aos servizos estará dispoñible para a súa consulta na páxina web www.bus.gal.

O conselleiro de Presidencia, Xustiza e Deportes, Diego Calvo, lamentou que o Executivo central non ofrecese unha alternativa para a conexión dos viaxeiros coa cidade de Vigo na reunión que mantivo a semana pasada o alcalde de Vigo, Abel Caballero, co ministro de Transportes e Mobilidade Sostible, Óscar Puente.